ماكياج العروسة كلة - روعة
كل بنوتة حلوة مقدمة على الزفاف بتحب تعرف اية افضل ماكياج للوجه كلة
عشان كدة دى خطوات عمل ماكياج العروسة بطريقة سهلة ولذيذة :
اولا : تثبيت الآي شادو :
نبدأ بتوزيع الكونسيلر على العين من فوق ودة علشان الآي شادو اللي هاحطه بعد كده يبقى ثابت أكتر ، وتحت العين هاحط كونسيلر أبيض "ماط" .
ثانيا : رسم خط آي لاينر رفيع :
نبدأ برسم العين بالآي لاينر قبل ما نوزع كريم الأساس على البشرة ونرسم خط رفيع أوي فوق الرموش ودة علشان هيتغطى بالرموش الصناعية اللي هنحطها.
ثالثا : لزق الرموش الصناعية :
الرموش اللي ممكن نستخدمها قصيرة من جوه وبتطول بالتدريج على بره ودة علشان نفتح الحواجب من بره وده بيدينا مساحة أكبر في جفن العين.
رابعا : تظبيط الحواجب :
الحواجب هخلّي شكلها مستقيم زي اليابانيين، لكن مع استدارة بسيطة، علشان تديني مساحة في جفن العين.
وبعد كده هارسمهم بلون أغمق شوية من لونها الطبيعي، بس لازم أراعي إن اللون مايبقاش تقيل أوي من قدام، وأبدأ أتقّل شوية في الحواجب من بره؛ علشان يبقى شكلها طبيعي.
خامسا : رسم العين بالآي شادو :
النهارده هاعمل رسمة سيمي سموكي (semi-smoky)وهابدأ بإني أحط لون آي شادو فاتح على الجفن المتحرك اللي فوق الرموش على طول.
بعد كده هاحط آي شادو أسود في المكان اللي بيفصل الجفن الثابت عن الجفن المتحرك، أو اللي بنسمّيه قوس العين، وده لازم أحطّه والموديل عينيها مفتوحة علشان يبقى باين، وبعدين بابدأ أسيّحه.
تحت الحواجب هاستخدم آي شادو لونه أبيض "ماط" مش لامع، وهاحط من تحته لون رمادي فاتح، وهسيّح كل الألوان مع بعضها، وفي الآخر هاحط تاني اللون الفاتح اللي فوق العين على طل علشان يدّي إضاءة للعين.
وهاحدد العين تاني بالآي لاينر، وده اللي هيبقى باين في النهاية، وخط الآي لاينر بيدّي شكل أوسع وأعمق للعين.
سادسا : توزيع كريم الأساس والبودرة :
أنا بافضّل دايما إني أرسم العين قبل توزيع كريم الأساس؛ علشان لو فيه آي شادو أو أي حاجة وقعت تحت العين أقدر أتعامل معاها بسهولة، وكمان الطريقة دي بتخلّي رسمة العين واضحة أكتر - لازم لون الوش والرقبة يبقى درجة واحدة.
أنا استخدمت درجة كريم أساس أغمق من لون بشرة الموديل بدرجة أو درجتين، علشان تبان كأنها واخدة لون برونزي شوية بس على فاتح مش غامق أوي - أما بقى بالنسبة للبودرة السايبة فأنا مابحبش أحط كمية كبيرة علشان اتبقاش باينة أوي وشكلها مش ظريف.
سابعا : تحديد الوش بأحمر الخدود :
باوزع البلاشر أو أحمر الخدود على الوش كله علشان يبان كأن الوش شكله صحي ووردي، وطبعا باتقّل اللون شوية عند الخدود.
ثامنا : تحديد ورسم الشفايف :
باختار لون الروج والتحديد بنفس اللون اللي هاحطّه تحت العين، وباحط التحديد الأول على الشفايف كلها، وبعد كده باحط الروج وبادمجه كويس مع التحديد.
تاسعا : تحديد العين بالكحل والماسكرا :
الكحل اللي هانستخدمه النهارده يعتبر من أفضل الماركات وهو ماك (Mac)والكحل اللي على شكل جل وده بيتحط بالفرشة، وهاحط منه فوق وتحت العين، والنوع ده بيفضل ثابت مع العروسة طول وقت الفرح، وفي الآخر بنحط الماسكرا على الرموش من فوق ومن تحت.
وهنا يبقى وصلنا للنهاية والف مبروك
